02
Feb
2012
Yè o swa /
An pran sonmèy owa pitit an mwen /
Anba bwa /
Rèv an mwen chayé mwen lwen /
An pèd fwa /
An téka palé épi zansèt nèg an mwen /
Kibitenkwa /
Ewè! Séla blan toujou kriyé èsklav /
Pandan yo menm téka kriyé yo Afriken, wa sav ●
Yo di mwen tèt a yo ka fè yo mal /
An mandè ès sé doulè a fwèt ka fè san koulé /
Yo di mwen a pa sé koufwèt la ki jen fè yo pi mal /
Davwa fwèt pa jen enpéché pon nèg lévé gaoulé /
Yo di mwen pli gwo doulè la sé chenn la /
Sé chenn la blan voyé tòtyé lèspri a yo la ●
"Nèg sé bèt/Nèg pani tèt/Nèg sé fennyan /
Nèg kon timoun/Nèg péké ay pon koté san blan" ●
Yo di mwen yo sav sé chenn la la toujou /
Yo ka santi yo kouri an lèspri an nou jòdijou /
Yo di mwen yo fèt lib é yo ka sonjé jan sa té bèl /
Zyé a zansèt, Fòs a fanmi, koudmen a zanmi téka ba yo zèl ●
Yo di mwen toujou rété doubout /
Yo di mwen toujou rété vayan /
Yo di mwen ni chalè an kò an nou tout /
Yo di mwen sé chalè a Lafrik péyi a ki nèg ki blan ●
Yo di mwen respèkté tout nonm tout fanm, tout ras /
Padavwa malpalé ké mélé'w mè rèspèkté ka lésé tras /
Avan an lévé an bo yo, an séré yo, an di yo nou ka kontinyé lalit /
Yo di mwen gannyé sé pa jen lésé chenn fè chimen an tèt a pitit
Kreyol / Spoken words
0
11
Jun
2009
Yo di "chaque tête, chaque esprit" /
Mè sonjé sé on komin ki dwèt lévé chak pitit ay /
Avan ou chèché zanmi, rikonnèt ka ki lenmi /
Fè féblès vin fòs pou dèmen lè tou aw vin /
Pon moun pa anpéché-w vin bòs ●
Sonjé zansèt aw! Pou chak aksyon yo goumé /
Pou jòdi jou ou ni sa'w ni /
Pitit a tig paka fèt san grif /
Alò fo pa yo flipé si-w agrésif lè yo komansé fè wòl /
Ti frè, ti sè, sonjé dèmen sé-w pitit aw ké swiv anlè tras a chimen kréyòl ●
Ti frè /
Kouté Papa mè sonjé kouté lèspri osi ●
Ti sè /
Swiv fanmi, swiv zanmi, mè sonjé dèmen sé-w nou ké kriyé Fanm Kréyòl ●
Tan ka pasé kon kawo cho a granmanman /
An ni lenprésyon avan yè ja vin "antanlontan" /
"Facebook" é "Playstation" pran plas a pishin é sèwvolan /
Piti a piti péyi an nou ka pèd silab! /
***Karukéra***Gwadloup***Gwada*** /
Si sa kontinyé sé ***G*** yo ké fè épi nou ●
Gran ka kritiké piti /
Piti ka dérèspèkté gran /
Ola sa sòti /
Pon moun pa sav mè nou tout o kouran /
Kilti vini pa jen pòté bon biten /
Mandé Afrika i ké di-w ●
Pawòl méné kritik /
Kritik viré méné pawòl /
Aksyon pa jen vwè jou /
Ki fè jòdi jou gran nonm ka maché a jounou ●
Ti frè, ti sè, enfòwmasyon ésansyèl a zòt ka ba zòt masko /
A pa ni la télé, ni adan liv, ni anlè entèwnèt zòt ké touvé-y /
Gadé zyé a Granmanman! Wouvè zyé si Granpapa! /
Yo paré pou palé .... Es nou paré pou kouté?
